之前心血來潮, 想整豆腐花好耐, 事關莎莎好鍾意食豆類製品, 豆腐係其中一樣, 再加上因為係網上面見倒姬絲汀小姐介紹佢整豆腐花嘅方法, 莎莎當然係急不及待去試下啦。
人生總有第一次, 上次第一次整嘅, 好明顯係衰左啦! 重點原因係, 買錯唔係新鮮嘅無糖豆漿, 再加上買錯左「生石膏粉」, 整出黎真係幾......咩囉! 結果試左少少, 成兜倒晒......
失敗乃成功之母, 於是, 今次莎莎突登去吉吉島買新鮮製嘅無糖豆漿, 再去另一間藥材鋪買過「熟石膏粉」, 上次果間好明顯係昆我, 我明明同佢講係用黎整豆腐花, 只係無同佢講「生」定係「熟」, 佢都俾啲「生石膏粉」我, 可惡! 今次呢間藥材鋪個伯伯好好人, 一聽倒莎莎問佢係咪有分「生、熟石膏粉」, 佢話有, 然後莎莎話要「熟石膏粉」, 佢就即刻就問莎莎係咪整豆腐花, 仲讚莎莎叻女添, 嘻嘻 
莎莎當然禮上往來, 讚返伯伯「醒目」啦!
換過晒啲材料之後, 跟住姬絲汀嘅食譜去整, 過程十分鐘倒, 整好之後等一個鐘, 打開嘅時候同老公都好緊張, 終於成功左啦!!! 超開心!!! 仲可以晌老公返工之前有得食添!!! 
凝固左嘅豆腐花, 因為整好無杓走啲泡泡, 所以連啲泡泡都凝固埋 ^^"
加左黃糖嘅豆腐花, 老公食得津津有味 
莎莎仲食左兩碗, 好滑, 好好味, 黎緊一定要再整先!
特別鳴謝: 姬絲汀小姐提供 --《簡易食譜 - 豆腐花》
