今個情人節, 同老公無乜特別慶祝嘅節目, 不過果晚就去左睇由Brad Pitt同埋Cate Blanchett主演嘅The Curious Case of Benjamin Button (奇幻逆緣), 最吸引莎莎嘅, 並唔係齣戲嘅故事, 而係Cate係戲入面冷豔嘅角式, 令到莎莎覺得Cate好charm。睇完戲之後就去左板前食壽司, 因為果陣已經差唔多凌晨一點, 所以差唔多「百無」, 就連莎莎最鍾意食嘅珍寶帆立貝都沽清...... 嗚嗚…… 可惡!!
講返送花, 其實好多女性, 都鍾意係情人節收花, 覺得咁樣先至係幸福, 又或者可以攞威攞采, 不過係莎莎嘅角度, 情人節送花係一種好浪費金錢嘅儀式, 如果一個男性係想送花俾自己, 點解一定要揀情人節先送呢? 幾時想送就送, 唔係更加好咩? 一來, 莎莎唔想拎住咁大扎花去行街食飯, 二來, 更加唔想俾啲無良商人抬高價嚟呃錢囉~~~~ 所以莎莎每年情人節都千叮萬囑老公, 千其唔好送花, 會殺人架~~~~ 
要送禮物嘅話, 揀啲實用為主嘅, 真係比較實際囉!
今年, 老公又蠱蠱惑惑, 初初淨係送雞雞, 點知激嬲左莎莎, 點解? 生日又送雞, 聖誕又送雞, 連情人節都送雞??? 雖然莎莎好鍾意雞雞, 但係咁無驚喜, 又俾莎莎覺得超級勁無心思, 唔嬲就假啦, 於是嬲左老公一晚, 實行抗議!!! 不過有人原來已經一早買左第二份禮物, 唔係莎莎實嬲死佢, 等佢食自己, 哼哼!!
激嬲左莎莎嘅傻雞 
收到即刻開心返晒嘅靚靚香水一支 
老公不愧為老公, 次次送俾莎莎嘅香水都好啱心意, 花香味帶少少甜, 又好啱夏天用, 好鍾意啊! (讚左你當補數架啦, 呵呵呵~~)
而老公嘅禮物呢, 係Plantronics最新嘅D925 Bluetooth Ear Phone, 本身係老公個客介紹俾佢嘅, 而老公個客幫佢買會平啲, 加上老公又幾鍾意個款, 同埋做野、揸車用都方便, 所以莎莎今次就等老公自己揀啦!
Plantronics D925 Bluetooth Ear Phone, 個款幾型仔, 仲係老公鍾意嘅黑色0添
同老公過嘅第四個情人節, 雖然無乜特別慶祝, 但係有自己愛嘅係身邊, 健健康康, 開開心心咁一齊渡過, 已經係一件幸福、滿足嘅事, 花巧嘅東東, 只係生活上嘅一啲點綴, 有嘅話當然開心, 無嘅亦唔會可惜, 珍惜眼前人, 先至係最重要。老公, 我愛你!
